سلام ياأمي

سلام يااامي علي حالك وولدانك يشيل عن عينك الآحزان


سلام يجلي ظلام الليل عن المسجد عن العشة عن الغيطان


أنا واقف علي بابك أبوس ايدك تقابليني خصيمك النبي العدنان


غلبت يامي أرضيكي وسال دمعي علي خدي كما الوديان


خدي روحي خدي عمري خدي قلبي وأنا الكسبان


داانا نفسي أهنيكي وتبقي للبلاد سلطان


وأطير ياامي في سماكي وأجبلك من القمر فدان


وارجع اسمك الغالي وأشوف نورك وعز زمان


وأخلي الصحرا مكسيه زهور وردي تغطيكي كما الفستان


أنا واقف علي بابك وباسأل ليه وبزعقها في كل مكان


يااامي ليه جفاكي الخير وفين نورك أديلو زمان


وليه زرعك كما ضرعك صبح دبلان


وشريااان الحياة فيكي صبح تعبان


وخدعوا الآرض جابت أكل بالسرطان


ويرضع منك الخنزير وطيرك م الضنا لهفان


وكبدي جاااع وولدي في الشتا عرياان


مسبش فيكي فتفوته تقويني ,,ولاضلة ولا قلة تبل الريق وتروي طفلك العطشان


وليه يااأم قصرك تسكنه الغربان


وليه يااأم طين الآرض خلوه للسجون حيطان


وضلعك ليه يااأم صار بعد الحنان قضبان


وليه جبتي أخويااا من الحشا سجان


وشال ظلمي علي صدره يااااأمي نشان


ودمي صار وأوصالي علي رأس الكلاب تيجان


وقدمتيني يااامي علي صنية لآولاد الخنا قربان


ركبتي سفينة مش ليكي وخليتي اليه ربان


وأدينا في توه وفي موجه بلا شطئان


تعبت ياااأمي رسيني دنا حيران


وصدقتي ان أنا كرهتك وأنا ولهان


باعيش غربة وأنا وياااك


وأنا براك جوايا وانا جواك أعيش براك


في حضنك اشتهي دفاكي ,,, وأنا في ضلك أكون حران


وأقلقل نفسي من طينك وجدري فيك وأروح لبعيد.......


وأجيك مغلوب


وأجيك تايه


واجيك غرقان


تعزيني وتبكيني وصيواني متين فدان


وأنا في حياتي كان يغنيني كام قصبة من الفدان


وفي الصيوان لسان وودان


وناس كسرة علي كسرة أشوف نسوان


وشخشيخة وطبيلة وزمارة مع الصبيان


وأشوف أستاذ وجنبه ع الهوا أبله ॥


بعين مش عين من البترول عزيزة واسمها عبلة


وصوته كبير يقول مظلوم بني الانسان


وهيه تقول يااادي الاحراج طلع عريان,,,,


وشيخ عالم وجنبه في المقام سكران


ورقاصة في عز سنينك الهبلة


بقت قبله ومسنوده من الديوان


بيحموكي بهز الوسط والطبلة


يعزوكي في ولدك اللي مات فطسان


وولدك اللي مات جيعان


وولدك اللي كان قبرة عمارة تابوت من الخرسان


وولدك اللي مات محروق في علبة حديد سنين تجري علي قضبان


وولدك اللي قال الحق باات مشنوق علي العيدان


وولدك اللي مات مكمود بإيد ولدك ورا القضبان


وولدك اللي مات مردوم وكان صاحي هنا وزمان بإيد (ديان)


وقتالي يعزيكي وبوس وأحضان


نكرتي كل نعم الله ياااأمي عدا النسيان


كلام مسموع وغيره كتير ورا الحيطان


دا كان فساد


وواد بطال وواد خرفان


وواد مش راضي بنصيبه مشي طفشان


من الآحكام


بلا فلقة ده كان هربان


وأبو طبلة يواسيني وأنا زعلان