الريس زي الفل

وكل اللي عملناه فيه اننا نفقع مرارته ده انجاز رائع وان شاء الله الشعب ده هيدوق طعم التغيير ’ مع روتيتو،

الحمد لله الريس كويس وبياكل عسل وزبادي وبينام دون انقطاع ,, اول ما سمعت دون انقطاع دي جات في بالي فكره الموت الاكلينيكي ,, يخرب بيت افكار الشيطان

بس الحمد لله الريس كويس وبياكل عسل وزبادي ,, بس احنا بقي اللي مش كويسيين ॥بناكل أكل مسرطن وبنشرب ماء مجاري ,, مين بقي اللي اتفقعت مرارته ,, سيصل الريس وهو كويس وبياكل عسل وزبادي الي ارض الوطن سالما ,, واحنا مرارتنا بتزداد التهابات ومفرقعه من زمن جوه ومستنيه دورها في الاستئصال علي نفقه الدوله المفقوع مرارتها



بكره برضو مراره اهل غزه المفقوعه من الف يوم (( الف يوم في الحصار علي غزه))



ممكن يخرجو يصرخوا من الالام في مظاهره سلميه عند الحدود فيقوم واحد مصري مفقوع مرارته يطلق النار علي واحد من غزه مفقوع مرارته ويموت فيرد اهل غزه المفقوع مرارتهم بالطوب علي المصري المفقوع مرارته ويطلق عليه النار من داخل مصر وتبقي مشكله تتكلم عنها كل الفضائيات المفقوع مرارتها واللي بتزود علينا فقع المراره



ده سيناريو بسيط للي ممكن يحصل بكره

ويبقي الريس كويس وبياكل عسل وزبادي

ودمتم